Skip to main content
Heim » Turar 2026 » Ville vesten & Yellowstone med Eva Bratholm og Joar Hoel Larsen

Ville vesten & Yellowstone med Eva Bratholm og Joar Hoel Larsen

18. - 28. august 2026. 

Vi er glade for å kunne presentere ein skikkeleg cowboytur til Den ville vesten. Dette er ein ekte roadtrip gjennom statane Colorado, Nebraska, Sør-Dakota, Wyoming og Montana, der nokre av høgdepunkta blir:

  • Besøk i Pine Ridge-reservatet 
  • Wounded Knee, der ein av dei verste massakrane av Sioux-folket skjedde
  • Badlands nasjonalpark
  • Mount Rushmore med dei fire presidentane meisla ut i fjellet
  • Crazy Horse-monumentet
  • Sioux-folket sitt heilage område i Black Hills
  • Landsbyen Sundance, gjort kjend av The Sundance Kid
  • Landemerket Devil’s Tower
  • Overnatting på westernhotellet The Occidental, der Butch Cassidy har overnatta
  • Little Big Horn, slaget der general Custer fall
  • Rodeo i cowboybyen Cody
  • Overnatting på Irma Hotel, bygd av Buffalo Bill
  • Yellowstone og Teton National Park


Eva Bratholm og Joar Hoel Larsen er fagguidar på turen. Eva har tidlegare vore korrespondent i USA og har skrive mange bøker om landet. Joar har lang fartstid som USA-kjennar og journalist. Han har skrive fleire bøker, mellom andre Cowboyer i amerikansk politikk frå Davy Crocket til George W. Bush. Ekteparet har reist mykje i området der turen vår går. Dei vil fortelje historier og anekdotar om dei kjende namna frå western-historia, som Sitting Bull, Jesse James, Wyatt Earp, Annie Oakley Buffalo Bill, general Custer, Calamity Jane, Wild Bill Hickok og mange andre.

Vi kan love ein eineståande tur til eitt av dei mest spanande områda i USA. På første delen av turen kjem vi nær innpå samfunnet, kulturen og historia til Siouxane. Her blir det både omvising på ein av ungdomsskulane deira og på colleget i reservatet. På veg vestover møter vi byar som har vore sentrale i westernhistoria og i ei mengd filmar og seriar. Her finn vi blant anna staden der serien Den ville vesten, som var så populær i Norge på 80-talet, var filma. Velkommen med på ein skikkeleg Ville vesten-tur!

[ Lukk ]
Søk

Bildegalleri

Viktig informasjon

Informasjon om visum/innreiseløyve og helsekrav

  • Dersom du har rørslehemmingar, avklar med oss om denne turen er egna for deg.
  • Informasjon om ESTA (USA):

Dei fleste treng berre ein godkjend ESTA-søknad for å få innreise til USA, men i nokre tilfelle er det naudsynt med visum. Du må sjølv setje deg inn i om du er ein av dei som må søke om visum. Dei som lyt søke om dette, må vere ute i god tid, då denne prosessen kan ta tid. 

Hugs at skjemaet om reiseløyve må fyllast ut og sendast elektronisk minst 10 dagar før avreisa.  

Dagsprogram

  • Atterhald om endringar

    Teiknforklaring for måltid inkludert i prisen:
    (F) Frukost
    (L) Lunsj
    (M) Middag

  • Dag 1: Tysdag 18. august - Frå Norge til Den ville vesten

    Vi møtest spente og forventingsfulle på Gardermoen og Flesland før vi går om bord i flyet.

    Vel framme på flyplassen i Denver tek vi buss på den korte vegen til hotellet vårt(for dei som har bestilt turen inkludert flyreise). På resten av turen vil vi nytte same buss. Vi får oss ei god natt søvn før roadtripen vår startar neste morgon.

  • Dag 2: Onsdag 19. august - Colorado, Nebraska og Sør-Dakota

    Etter ein god frukost møtest vi for ei lita samling der vi blir kjende med kvarandre og snakkar om kva vi kan vente oss resten av veka. Bussen køyrer oss så gjennom Colorado og vidare nordover. Sidan dette er ein tur med ein del lange etappar, vil Eva Bratholm og Joar Hoel Larsen bruke tida på bussen til å fortelje historier og anekdotar om westernhistoria og det vi ser og opplever undervegs.

    Det første stoppet vår blir i småbyen Cheyenne, der vi får strekt på beina og nyte litt fritid. På butikken The Wrangler kan ein sjå på ekte westernutstyr. Museet Cowgirls of the West ligg også her. Tida kan også brukast til å ta ein matbit på fargerike Sanford’s Grub & Pub eller besøke det elegante Plains Hotel frå 1911. Langs gatene ser vi flotte kunstverk med cowboy-støvlar. Alt dette finn ein på få kvartal, og  vi får tid til å trekke inn litt Ville vesten-atmosfære!

    Vi køyrer vidare og kjem til Fort Laramie, som er vårt neste stopp på turen. Dette er eit historisk anlegg som kastar lys over kavaleriets rolle og verdi. Fortet ligg ved eit kryssingspunkt der Laramie- og North Platte-elvene møtest. Reisande på Oregon Trail tok ofte pause her, og ein handelsstad voks raskt fram, før området vart fordelt mellom urfolket og dei kvite. No er vi også nær der Zeb Macahan og familien hans frå TV-serien Den ville vesten budde ein periode før dei drog vidare mot Oregon.

    Om kvelden er vi framme ved hotellet vårt litt utanfor Rapid City. Her skal vi bu dei neste tre nettene. Vi dreg samla til ein lokal restaurant og et ein god middag saman. No er vi i hjartet av Den ville vesten!
    (F, M)

  • Dag 3: Torsdag 20. august - Pine Ridge, Wounded Knee og The Badlands

    Etter frukosten på hotellet køyrer bussen oss inn i Pine Ridge-reservatet til Red Cloud Indian School and Historic Cemetery. Når vi nærmar oss reservatet, ser vi at landskapet er skrint utan noko særleg jordbruk. Ogalala-siouxane fekk land her i 1889, og det var vanleg at urbefolkninga fekk det dårlegaste jordbrukslandet. Reservatet er eitt av dei største i USA og omfattar fleire fylke og småbyar. Eva og Joar gir oss ei oversikt over dei ulike samlingane av urfolk, og dette får vi høyre meir om seinare på turen.

    Mykje positivt har skjedd her dei siste tiåra. Likevel er dette eitt av dei fattigaste områda i USA med gjennomsnittleg levealder på 47 år for menn og 52 år for kvinner. På 70-talet fekk dei sitt første college, og i dag er dette eit fullverdig universitet med 4-årig bachelorprogram, og til og med eit masterprogram i leiing. Vi får også sjå ein av dei private ungdomskulane i reservatet, som kan vise til mange elevar som har gått vidare derifrå til gode universitet. Fleire av desse er no tilbake på reservatet som lærarar for å hjelpe andre med å få seg ei god utdanning.

    Denne dagen dreg vi på ei utflukt til Pine Ridge og the Badlands, noko aust for Rapid City. Her besøker vi først Oglala Lakota-høgskulen. Vi møter den lokale guiden og representant frå Oglala Lakota- folket her. Guiden tek oss med rundt om på skuleområdet. Her må vi gjerne kjøpe med oss suvenirar for å støtte lokalbefolkninga og skulen.

    Turen held fram til monumentet for massakren ved Wounded Knee. I romjula 1890 vart mellom 250 og 300 Lakota Sioux, både menn, kvinner og barn massakrerte av det 7. kavaleri-regimentet. Monumentet ligg i nærleiken av massegrava frå 1890, og vi får høyre frå representanten frå reservatet kvifor dette er ein så viktig stad for Sioux-folket i dag.

    Ikkje før i 1990 fekk Siouxane ei offentleg orsaking frå staten for massakren, men æresmedaljane (Medal of Honor) gjevne til soldatane er framleis ikkje kravde inn att av det offentlege USA.

    Neste stopp er Pine Ridge Visitor Centre i Kyle. Her får vi ein kort presentasjon av historia til Sioux-folket og ser ei utstilling med seks installasjonar som skildrar historia til den lokale stammen. Bygningen vi besøker blir òg nytta av Pine Ridge Area handelskammer, som kontinuerleg arbeider for å betre livskvaliteten til folket i reservatet. Vi et lunsj samtidig som vi får informasjon om kunstprogrammet dei tilbyr lokalbefolkninga.

    Etter lunsj tek bussen oss nordover til Badlands, eit heilt spesielt fjellområde, som har status som nasjonalpark. Ved foten av fjella besøker vi Ben Reifel Visitor Center. Her kan vi få oss nokre enkle forfriskingar og elles sjå ulike utstillingar med informasjon om nasjonalparken. Vi er no i ein region med mykje historie om urfolk, men også norsk utvandrarhistorie. Joar og Eva fortel på bussen om korleis nordmennene deltok i, og reagerte på krigane mot urfolket.

    Det blir eit kort stopp på Wall Drug Store, ein heilt spesiell attraksjon på vegen mot Rapid City. Frå 30-talet tilbaud den vesle butikken gratis isvatn til reisande på hovudvegen I-90, og no stoppar over to millionar menneske kvart år her. Suvenirbutikkar, kaféar og mykje anna har komme til, og det har stått artiklar om den vesle byen både i New York Times og utanlandske aviser.

    Tidleg om kvelden er vi tilbake i Rapid City.
    (F)

  • Dag 4: Fredag 21. august - Rapid City, Mount Rushmore og Crazy Horse-monumentet

    Denne dagen kan ein anten bli i Rapid City eller vere med på ein heildagstur med buss til Mount Rushmore og Crazy Horse-monumentet. Prisen på heildagsturen med lunsj er kr. 1905, og kan bestillast seinast på dag 2 av turen. Vi køyrer sørover i Black Hills, som har vore eit heilagt område for Sioux-stammane. Før Siouxane heldt også Cheyennene-, Crow-, Kiowa- og Pawnee-folk til her.

    Urfolket hadde fått Black Hills i Fort Laramie-avtalen i 1868, men miste det då George Armstrong Custer sitt 7. kavaleri oppdaga gull der. Dette førte til at tusenvis av lukkejegerar strøymde til fjellområda. Det var også provoserande for urbefolkninga då det i 1927 vart starta arbeid med å meisle ut ansikta til fire presidentar ved Mount Rushmore. No er dette ein av dei mest besøkte stadene i USA med over 2 millionar turistar i året. Vi stoppar og gir oss tid ved denne berømte attraksjonen.

    Turen går vidare til Crazy Horse-minnesmerket. Dette er også ein gigantisk statue som vil vere 195 meter brei og 172 meter høg når den er ferdig. Arbeidet med monumentet starta opp i 1948 som eit direkte svar på Mount Rushmore, og som eit minnesmerke over lidingane til urbefolkninga i Nord-Amerika. Eva og Joar fortel om kvifor Black Hills var viktig både for urbefolkninga og europearane, og korleis krigane som starta her leia fram mot slaget ved Little Bighorn. Vi startar besøket ved Crazy Horse med ein god lunsj før vi ser området i eige tempo.

    Bussen tek oss austover mot Rapid City igjen, og er vi heldige, får vi sjå noko av det varierte dyrelivet i kvitgran- og gullfuruskogane. Her finst både bison, kvithalehjort, mulhjort, prærieantilope, tjukkhornsau og puma. På vegen stoppar vi også ved ein norsk raritet. Her finn vi ein kopi av vakre  Borgund stavkyrkje i noko forminska storleik.

    Om kvelden tek bussen oss til sentrum av Rapid City. Reiseleiaren vår viser oss fleire stader vi kan ete middag denne kvelden.
    (F)

    Fredag 21. august - Rapid City, Mount Rushmore og Crazy Horse-monumentet

  • Dag 5: Laurdag 22. august - Deadwood, Sundance og Devil’s Tower

    Det er tid for å halde fram turen vestover, og etter frukost set vi kursen mot Deadwood. Denne byen er nesten som ei filmkulisse, med barar og hotell som ser ut som slike saloonar vi kjenner frå western filmar. Her ser vi teikn på gruvedrifta som kom med gullrushet, og som no er overteke av gambling og kasino. Her stoppar vi ein times tid før vi dreg til Vore Buffalo Jump. Dette er ei tradisjonell jaktgrop. Når dei jakta, sørga dei for at bøffelflokken sprang utfor kanten og datt ned skrenten. Dyra slo seg ihel eller vart så skada at dei ikkje kunne springe vidare og vart avliva. Dette var ein viktig del av præriekulturen før dei byrja å stele hestar frå dei kvite, som dei deretter nytta i jakta.

    Bussen tek oss vidare til den vesle byen Sundance. På vegen passerer vi grensa til Wyoming, og landskapet flatar seg ut ein del. I bussen fortel Eva og Joar om Butch Cassidy and the Sundance Kid,  kjend frå filmen frå 1969 med Robert Redford. På turen vidare vestover køyrer vi forbi Devil’s Tower, eitt kjent landemerke for nybyggjarar på veg vestover og USAs første nasjonalmonument i 1906.

    Vi kjem tidleg på dag til idylliske Buffalo, som ligg ved foten av Big Horn-fjella. Her et vi lunsj før vi sjekkar inn på dei to hotella våre. Ein kan velje å bu på historiske Occidental Hotel, der Butch Cassidy, The Sundance Kid, Buffalo Bill og Ernest Hemingway har overnatta (overnatting mot tillegg i pris), eller på eit nyare hotell.

    Om kvelden blir det fellesmiddag på Occidental Hotel, og vi anbefaler noko å drikke i hotellbaren etterpå. Der kan ein enno sjå kulehola frå skotvekslingar frå slutten av 1800-talet. “The Virginian” av Owen Wister, av mange kalla den første westernromanen, vart også skriven på dette hotellet.
    (F, M)

  • Dag 6: Søndag 23. august - Little Bighorn Battlefield

    Etter frukost tek bussen oss nordover langs Bighorn-fjella over grensa til Montana og inn i Crow-folket sitt land. Eva og Joar fortel i bussen om kva som førte til slaget ved Little Bighorn 25.-26. juni 1876. Vi køyrer så til Crow Agency, hovudbyen i Crow-reservatet, og tek av til minnesmerket for slaget. Eva og Joar viser oss rundt på slagmarka, der oberstløytnant George Armstrong Custer og 257 andre offiserar og soldatar døydde. Hæren til urfolket vart leia av Sitting Bull, Crazy Horse og andre kjende høvdingar. Sjølve slaget vart utkjempa over eit stort område, og dei falne på begge sider har fått kvar sin plakett med namnet på, der dei vart funne. Det er også sett opp eit nasjonalmonument over slaget like ved der Custer døydde.

    Det blir felleslunsj på ein restaurant rett ved Little Bighorn. Etter lunsj gir vi oss god tid ved besøkssenteret der ein både kan sjå ein film og høyre på ein Park Ranger fortelje om slaget.

    Turen går vidare vestover forbi Billings, den største byen i Montana, og så sørover til Cody, Wyoming, der vi skal bu i tre netter. Cody er ein ekte cowboy-by der ranching framleis er ein viktig del av økonomien. Dette er kanskje den byen på turen som har gjort mest for å trekke til seg folk som er interesserte i Den ville vesten.

    Vi sjekkar inn på historiske Irma Hotel i hovudgata i byen og The Cody Hotel rett utanfor sentrum. Irma Hotel vart bygd av Buffalo Bill i 1902 og vart kalla opp etter dottera hans, Irma. Då det var ferdigbygd, sa Buffalo Bill at det var just the sweetest hotel that ever was. Dei som vel å bur her, får historiske rom (overnatting mot tillegg i pris).
    (F, L)

    Søndag 23. august - Little Bighorn Battlefield

  • Dag 7: Måndag 24. august - Cowboydag i Cody

    Denne dagen startar med ein frivilleg aktivitet på The Cody Firearms Museum. Der får alle som vil velje eit kjent våpen frå westernhistoria, høve til prøveskyting. Ein kan velje mellom ein Colt-revolver eller ei Winchester-rifle (inkludert i utflukta). Det er også mogeleg å betale ekstra for å prøve fleire ikoniske våpen frå westernhistoria, som Smith and Wesson eller det første maskin-geværet, Gatlin Gun. Eigaren av The Cody Firearms Museum var tidlegare engasjert i det historiske museet i byen, og han guidar oss gjennom westernhistoria og fortel korleis den teknologiske utviklinga av våpena endra historia. Denne aktiviteten kan kjøpast mot tillegg i pris.

    Heile gruppa møtest deretter på Old Trail Town, som har ei samling med hus frå førre hundreårskifte, inkludert ei hytte der Butch Cassidy og The Sundance Kid budde. I samlinga er der også ei rekke gjenstandar frå western-historia. Ein «Trail Town» var ein provisorisk by som var sett opp i hu og hast for å tilby spesielle varer og husrom for immigrantane som var på veg vestover.

    Bussen tek oss så til sentrum, der det blir lunsj og god tid på eiga hand på fantastiske Buffalo Bill Center of the West. Dette senteret rommar heile fem ulike museum, blant  anna eit historisk museum og eitt av dei beste musea i USA om den amerikanske urbefolkninga si historie og kultur. Vi legg opp til at ein kan bruke så mykje tid ein ønsker her, og til og med kome tilbake dagen etter om ein ikkje rekk over alt.

    Om kvelden samlast vi på Cody Cattle Company, der vi får servert ein skikkeleg cowboy-buffé. Etter middag blir det konsert.

    For dei som vil, kan ein legge til enda meir Cowboy-stemning denne kvelden og vere med på Rodeo. Det er ein fantastisk sport å vere vitne til! Dei som bur i sentrum, får buss fram og tilbake etter underhaldninga. Rodeo-opplevinga kan kjøpast mot tillegg i pris.
    (F, M)

  • Dag 8: Tysdag 25. august - Fridag i Cody, eller utflukt til Yellowstone og Old Faithful

    Denne dagen har vi lagt opp til ein fridag på eiga hand i Cody, eller du kan delta på ei utflukt til Yellowstone nasjonalpark (mot tillegg i pris). For dei som ønsker ein fridag, kan vi tipse om mange aktørar som tilbyr ulike aktivitetar. Vi vil anbefale å vere med på ein Trolly tour for å lære meir om byen. Dette er det tradisjonelle Ville vesten sitt svar på dei raude dobbeldekkarane i London. Meir informasjon om dette får du i programmet som blir sendt ut rett før avreise.

    Cody har mange butikkar og kafear, og fleire små, interessante museum som The Dug Up Gun Museum og Cody bymuseum. Vi kan elles anbefale Cody Gunfight, som er eit lite skodespel med westerntema, sjølvsagt med ein revolverduell , som går føre seg rett utanfor Irma Hotel.

    For dei som deltek på utflukta til Yellowstone, vil bussen ta oss med langs Shoshone River, som etter kvart tek oss til Yellowstone Lake. Allereie her ser vi små røykdottar langs bakken, som kjem av dei mange varme kjeldene som parken er så kjend for. Første stopp blir den mest kjende varme kjelda av dei alle – Old Faithful Geyser. Her gir vi oss god tid, slik at vi får med oss eit utbrot frå geysiren. Det blir også tid til å ete lunsj og å sjå seg om på det svært gode besøkssenteret. Der kan ein også lære meir om Shoshone-urfolket frå dette området som vart kalla tukudeka, eller saue-etarar, sidan dei først og fremst jakta på villsau. Eva og Joar fortel meir om det amerikanske urfolket og dei første europearane i nasjonalparken.

    Ferda går så sørover i retning ein ny nasjonalpark, Grand Teton National Park. På vegen er det stor sjanse til å sjå dei mange dyreartane i parken. Deltakarar frå Fotefar har sett både bjørn, bison og ulike typar hjort på tidlegare turar, så her gjeld det å ha auga med seg!

    Denne kvelden vert det middag på eiga hand. Etter middag anbefaler vi ein tur til den antikke hotellbaren på Irma Hotel. Den nydeleg utsmykka bardisken var ei gåve frå dronning Victoria av England til Buffalo Bill til opninga av hotellet, og her har mange kjende personar frå westernhistoria teke ein drink.
    (F)

  • Dag 9: Onsdag 26. august - Frå Cody til Cheyenne

    Etter ein god frukost set vi oss i bussen og set kursen mot Cheyenne. Dette er ein lengre etappe med om lag 5 timar køyretid, så Eva og Joar får god tid til å summere opp det vi har sett, opplevd og lært på ferda vår. Vi legg opp til nokre stopp undervegs for å ete lunsj på eiga hand og få ein pust i bakken.

    Vi er framme i Cheyenne om ettermiddagen. Her vert det litt tid til å sjå seg rundt i gatene, handle, eller kvile etter ein lang køyredag. Vi samlast igjen om kvelden og et middag med gruppa.
    (F, M)

  • Dag 10: Torsdag 27. august - Cheyenne tilbake til Denver

    Etter frukost går den siste etappen mot flyplassen i Denver, som er ein køyretur på om lag to timar. Om ettermiddagen går vi om bord i flyet, og startar ferda heim att til Norge.
    (F)

  • Dag 11: Fredag 28. august - Frå Ville vesten til Norge

    Denne dagen er vi heime etter ei spennande reise i Den ville vesten.
     

AvreisedatoAvreisestadHotellLedige plassarFrå pris
18/8BergenDen ville vestenMeir enn 848 950,-BestillMer informasjon
Les meir om Den ville vesten»
18/8OsloDen ville vestenMeir enn 847 950,-BestillMer informasjon
Les meir om Den ville vesten»
18/8UtanDen ville vesten538 950,-BestillMer informasjon
Les meir om Den ville vesten»
Reisekalender
14/1Vinterreise til Færøyane med Kirsti MacDonald JaregFrå 16 950,-
8/2Vandretur på Gran CanariaFrå 19 950,-
8/2Vandretur på Gran CanariaFrå 16 550,-
Kontakt oss
Telefon: 918 20 304
Våre telefontider er 09.00 til 12.00.
E-post: post@fotefartemareiser.no
Adresse:
Fotefar Temareiser AS
Sognefjordvegen 40
6863 Leikanger
Kontaktskjema
  • RGF Logo
Powered by Travelize